Mikesha dhe miq të dashur,
Kemi kënaqësinë t’ju ftojmë të vini në Ulqin, më 4 prill 2024.
Me këtë rast do të prezentojmë Konkursin shumëgjuhësh për tregime të shkurtra rreth temës së pajtimit Biber, përmbledhjet e tregimeve që dolën nga Konkursi, autore e autorë nga rajoni, do të diskutojmë për rëndësinë e letërsisë dhe artit të angazhuar shoqëror në përgjithësi.
Ngjarjen po e organizojmë në Librarinë Ulqini, të enjten më 4 prill 2024, nga ora 17:00.
Në bisedë do të marrin pjesë autoret dhe autorët e tregimeve të botuara nga konkursi Biber
Aida Sheçiq Nezireviq (Travnik),
Sërgjan Mileviq (Beograd),
Nikola Nikoliq (Podgoricë),
Katarina Miliqeviq (Ekipi Biber, Qendra për Veprim të Padhunshëm Sarajevë-Beograd),
Qerim Ondozi (përkthyes, Prishtinë).
Bisedën do ta udhëheqë Arlinda Osmanoviq.
Organizatorë: Qendra për Veprim të Padhunshëm Sarajevë-Beograd dhe Libraria “Ulqini”
Përmbledhjet e tregimeve që po i prezentojmue janë fryt i konkurseve për tregim të shkurtër Biber që për temë kanë pajtimin në kontekstin e pasojave të luftës dhe të dhunës në vendet e ish-Jugosllavisë, si dhe tregimet të cilat mund t’i ndihmojnë mirëkuptimit më të madh ndërmjet njerëzve, zbutjes së urrejtjes dhe kapërcimit të paragjykimeve, pastaj tregimet kundër luftës, tregimet të cilat ballafaqohen me të kaluarën, me kapërcimin e pasqyrimeve të armikut, tregimet për dhembshurinë ndaj tjetrit, tregimet e guximshme të cilat marrin guximin të ecin me këpuca të „armikut“, tregimet të cilat i lëviizin kufijtë dhe na i hapin rrugët për të ndërtuar një të ardhme më të qartë, më të sigurtë e më të lirë për të gjithë.
Konkurset dhe të gjitha përmbledhjet e tregimeve janë shumëgjuhëshe dhe në to mund të marrin pjesë autore dhe autorë që shkruajnë në shqip, boshnjakisht, malazezisht, kroatisht, serbisht ose maqedonisht.
Versionet elektronike të të gjitha përmbledhjeve “Biber” mund t’i gjeni në faqen https://biber.nenasilje.org/biber-price/ dhe janë falas për t’u shkarkuar.
Ju mirëpresim!
Ekipi Biber
